لية تشتري iPhone
فتعالوا نشوف أهم مميزات الموبايل وليه ممكن تشتري آيفون..
⭕ جودة التصنيع ⭕
الآيفون على عكس كل الموبايلات الصيني بيقدم جودة تصنيع تعد معيار في المجال لباقي الموبايلات. هنا بتكلم على الخامة اللي بتُستخدم في صنع الموبايل واختبارات الجودة الرهيبة اللي بيمر عليها الآيفون للتأكد من توفير منتج بأعلى مواصفات ممكنة.. يعني انت بتشتري منتج يعيش معاك سنين بدون ما تشتكي.
⭕ قيمة الآيفون المستعمل ⭕
لو حبيت في يوم من الأيام تبيع موبايلك الآيفون فهو هيحتفظ بأعلى قيمة من السعر اللي اشتريت بيه.. على عكس موبايلات الأندرويد اللي سعر المستعمل منها بيكون أقل بكتير من سعر الشراء.
⭕ تحديثات مستمرة ⭕
من مميزات آبل إنها بتوفر تحديثات لموبايلاتها لعدة سنوات. مثلا iPhone 6 اللي صدر عام 2014 فضل يتلقى تحديثات من الشركة لغاية العام الحالي 2021.. وبرأيي آبل تتفوق في النقطة دي على جميع شركات الموبايل الأخرى باستثناء شركة نوكيا الحالية.
⭕ كاميرا فائقة الجودة ⭕
لو اتكلمنا في آخر 6 سنين عن أفضل 3 موبايلات من حيث الكاميرا بنسمى بسم الله ونقول منهم آيفون. آبل بتهتم كتير بجودة التصوير في كاميرات موبايلاتها سواء الصور أو الفيديو.. نلاحظ ده في مؤتمر آبل الأخير اللي خصصت جزء مهم منه لاستعراض ميزة تصوير الفيديو الجديدة Cinematic Mode لدرجة إنها صورت جزء كمقطع من فيلم باستخدام الميزة دي وبكاميرا آيفون.
لو معاك آيفون مفيش خروجة لصحابك هتحصل من غيرك يا معلم..
⭕ معالج فائق ⭕
معالجات آبل Bionic Chip تعتبر من أقوى المعالجات الموجودة في أي موبايل.. ومعالج آيفون 13 الجديد A15 Bionic بيتفوق حاليا على Snapdragon 888 الموجود في فلاجشيب سامسونج S21 وشاومي Mi 11 Pro. وبالتالي لو معاك آيفون 13 فانت معاك أقوى معالج موبايل حتى الآن.
⭕ الحماية والخصوصية ⭕
بصراحة أنا كنت مش هذكر النقطة دي بسبب بعض المشاكل اللي عانت منها آبل في 2021 من تطبيقات ضارة على المتجر، اختراقات مستمرة لنظامها باستخدام برمجية "بيجاسوس"، سوء تعاملهم مع الباحثين الأمنيين اللي بيبلغوا الثغرات، الاختراع العجيب بتاعهم بخصوص التفتيش في صور المستخدم على آي كلاود قال إيه عشان يعرفوا لو في عنده صور مسيئة للأطفال.. وغيرها من المشاكل اللي سبق ونشرت عنها.
الحماية والخصوصية اللي بيوفرها الآيفون ((حاليا)) مقابل المميزات ودرجة التحكم في الموبايل اللي بيمنعها عن المستخدم بالنسبالي صفقة خاسرة..
لكن أنا ذكرت النقطة دي تحديدا عشان ميزة Anti-Tracking اللي يقدر من خلالها المستخدم يمنع التطبيقات من تجميع بياناته أو تتبع نشاطه على الجهاز..
كمان في مميزات جديدة لإخفاء الآي بي والإيميل الخاص بالمستخدم واستخدام الآيفون كوسيط لتوفير آي بي وإيميل وهمي لحماية معلومات المستخدم..
دي مميزات مهمة جدا جدا لأي شخص بيهتم بخصوصيته ووجودها كفيل إنه يرجح كفة الآيفون على الأندرويد في نقطة الخصوصية.
⭕ المكانة الاجتماعية ⭕
ستيف جوبز نجح بشكل مفيش حد هيقدر يكرره تاني إنه يربط علامة آبل التجارية بمكانة الشخص الاجتماعية.. ده معناه إن اللي معاه آيفون بيكتسب مكانة اجتماعية لا يمكن يكتسبها أي شخص معاه موبايل أندرويد حتى لو كان سامسونج S21 مثلا..
هتلاقي دايما الأشخاص في المناصب المهمة موبايلهم آيفون.. محمد صلاح مثلا كان عامل إعلان لأوبو على تويتر وإنه موبايله الجديد وإيه العظمة دي وبعدين نشر الإعلان من موبايله الآيفون..
مديري شركات الموبايل نفسهم زي ريلمي وهواوي وشاومي بيستخدموا آيفون !!