يعني اي نظام ساعات معتمدة | كل ما تريد معرفتة عن نظام الساعات المعتمدة

 

 يعنى ايه نظام ساعات معتمدة ؟

ناس كتير بتسمع اسم النظام ده ومش فاهمة يعنى ايه 

الاول أغلب كليات الهندسة على مستوى الجمهورية ماشية بنظام ايه ؟

كلية الهندسة بيبقى فيها نوعين من الاقسام 

اقسام عامة ودى اللى بتبقى بمصاريف السنة العادية وده اللى هو التعليم المجانى يعتبر 

اقسام خاصة ودى بيدفع فيها نفس المصاريف العادية + مصاريف خاصة بتحددها الكلية 

الاقسام العامة فى كل الكليات ماعدا الاسكندرية وعين شمس ماشية بنظام اسمه نظام الفصلين 

ايه هو نظام الفصلين ؟

الدراسة فى الكلية عبارة عن 5 سنين اول سنة اسمها اعدادى و 4 سنين تخصص وكل سنة ترمين ترم اول وتانى

بتاخد مواد فى كل سنة مفروضة عليك لازم تاخدها ملكش فيها اى اختيار ولو شلت مادة او اتنين بيتاخدو السنة اللى وراها فى نفس الترم بجانب باقى المواد

ولو شلت 3 مواد بتعيد السنة كاملة بتاخد فيها الـ 3 مواد دول بس

الاقسام الخاصة بقى دى ماشية بنظام الساعات المعتمدة 

وكليات الاسكندرية وعين شمس ماشيين بنظام الساعات المعتمدة

( مش معنى كدا انه بمصروفات خاصة العام لا خالص نفس المصاريف العامة عادى والاقسام الخاصة هى اللى بتدفع المصروفات الخاصة )

نظام الساعات المعتمدة اسمه Credit Hours System

وعلشان الاقسام الخاصة هى اللى مطبقاه على مستوى الجمهورية علشان كدا شائع ان الكريديت هم اللى بفلوس لكن طبعا الكلام ده مينطبقش دلوقتى على هندسة اسكندرية وعين شمس هتقول كريديت فيهم هيجى السؤال اقسام عامة ولا خاصة ؟ لان الاتنين كريديت 

نرجع ليعنى ايه نظام الساعات المعتمدة 

الاول يعنى ايه ساعة معتمدة ؟

الساعة المعتمدة هو قيمة معينة بتتحسب من متوسط لعدد ساعات تدريس مادة فى الاسبوع من محاضرات وسكاشن ومعامل 

كل مادة بيبقى ليها قيمة فمادة يبقى قيمتها ساعتين مادة قيمتها 3 ساعات 

التقديرات بتتحسب ازاى ؟

التقديرات بالحروف الانجليزى 

اللى يجيب 97 % او اكتر بياخد تقدير A+

اللى يجيب 93 % لحد 96 % بياخد تقدير A

اللى يجيب 89 % لحد 92% بياخد تقدير A-

اللى يجيب 84 % لحد 88 % بياخد تقدير B+

وتستمر النسب زى ما فى الصورة كدا

تستمر معانا

B

B-

C+

C

C-

D+

D

اخر تقدير ده اللى هو D ده من 60 % لـ 63 %

وده هو النجاح فى المادة 

اقل من 60 % بياخد تقدير F وده معناه ساقط 

ولو محلتش نسبة معينة من ورقة امتحان الفاينال بتاخد تقدير Fr حتى لو جايب فوق 60 باعمال السنة وده ساقط برضه بس بسبب امتحان الفاينال محلتش فيه مش مجبتش 60

طيب عدد السنين فى الكلية اللى بساعات معتمدة ماشى ازاى 

الاول نتفق مفيش تعريف لحاجة اسمها سنة 

فى حاجة تانى اسمها Levels

اول Level هو Level 0 اللى هو اعدادى فى نظام الفصلين 

بعد كدا Levels من 1 لـ 4 دول التخصص 

ليه اسمهم Levels مش سنين يعنى ؟

الموضوع بيمشى انك بتختار بنفسك كل ترم هتاخد ايه مش مجبر على حاجة

يعنى نتكلم عن هندسة عين شمس مثلا هنا بيطبقو الموضوع من اول دخول الكلية 

فى مواد بيختار ياخدها ترم اول ولا ياخد غيرها وياخد دى الترم التانى 

يعنى مثلا ممكن واحد ياخد مادة الكيميا فى الترم الاول ومياخدش انتاج وياخده فى الترم التانى وواحد تانى يختار العكس

فالموضوع معقد شويتين 

هندسة اسكندرية مش بيمشى فيها كدا قوى فى اول ترم بيسجلو كله مقررات معينة والاختيار بيبدأ من تانى ترم 

المهم لما بقول ترم اول وتانى فدول ترم اول فى الكلية وترم تانى فى الكلية مش ترمين فى الـ Level او ترمين فى السنة 

الموضوع يفرق 

الترم بيبقى فيه عدد ساعات معتمدة يتسجل 

أول ترم فى الكلية بيتسمح بـ 18 ساعة معتمدة لكله ومواد الترم بتبقى فى النطاق ده او اقل ساعة او اتنين 

اول ترم فى الكلية خلص 

ايه اللى بيحصل ؟

بتطلع نتيجة واه لازم عافية تطلع النتيجة بدرى مينفعش تتاخر باى شكل من الاشكال 

لان الترم اللى ورا الاول هيترتب عليه نتيجة الترم الاول

النتيجة بتطلع فى صيغة ايه ؟

فى صيغة تقدير اسمه الـ GPA 

التقدير ده عبارة عن حسبة معينة بيضرب فيها قيمة لكل تقدير لمادة فى عدد ساعات المادة ويتجمع حاصل الضرب ده لكل المواد وفى الاخر يتقسم على عدد ساعات كل المواد فى الترم 

يطلع تقدير من 4 

لو واحد جاب D فى كل المواد وده اللى هو تقدر تقول عليه مقبول بيجيب 

1 من 4 

لو واحد جاب C فى كل المواد وده تقدر تسميه جيد مرتفع بيجيب

2 من 4

لو واحد جاب B فى كل المواد بيجيب 3 من 4 

لو واحد جاب A او A+ فى كل المواد بيجيب 4 من 4

وطبعا دى افتراضات يعنى بوضح بيها لكن عادى طبعا الناس ممكن تجيب ميكس مادة كدا على مادة كدا فتطلع ارقام بكسور من 4 

اللى عايز اوضحه من اللى فات هو أهمية GPA الترم

اللى يجيب GPA 2 واقل من 3 

بيتسمحله الترم اللى وراه يسجل لحد 18 ساعة اللى هو الوضع العادى يقدر ياخد كل الترم ببساطة كدا 

الـ GPA 2 ده بيوازى 70 %

اللى يجيب أقل من 2 بيحصله ايه ؟

بيتحرم من عدد ساعات الترم اللى وراه وبيسمحله اقصى حاجة ياخد 12 ساعة يعنى لو الترم 17 ساعة هياخد 12 بس ويتحرم من 5 ساعات اللى هم مثلا مادة ب 3 ساعات ومادة بساعتين

+ بياخد اول انذار بالرفد 

والرفد محتاج 4 انذارات متتالية 

فلازم كدا اى حد فى النظام ده يجيب 70 % على الأقل فى الترم لو جاب فى مادة اقل من C يعوض فى مادة تانى علشان فى المجمل فى الاخر يجيب GPA 2 فاكتر 

اللى بيجيب GPA 3 او اكتر من حقه يسجل فى الترم اللى وراه 21 ساعة 

فى Level 0 اللى هو اعدادى ده يعتبر قسم منفصل فمفيش حاجة ممكن تتسجل من الاقسام فاللى بيجيب اكتر من 3 فى اول ترم مش بيستفيد حاجة لان مفيش حاجة زيادة يقدر يسجلها 

لكن فى القسم يقدر يستفيد وممكن يسجل مواد زيادة حسب عدد الساعات وحسب عدم تعارض المواعيد وعدم وجود متطلب مسبق للمادة ودى نقطة مهمة هتكلم فيها برضه 

ايه موضوع المتطلب المسبق دى ؟

معظم المواد ليها متطلب مسبق 

يعنى علشان تاخدها لازم تكون ناجح فى مادة تانى قبل كدا 

لو مش ناجح فى المادة الاولانية ؟ 

مش هتاخد المادة التانية غير لما تنجح فى المادة الاولى 

ومش هتاخد دى تفرق عن تسقط دى حاجة ودى حاجة تفرق جامد

مش هتاخد مادة فدى كأنها متأجلة يعنى 

لكن تسقط فى مادة الموضوع مختلف 

لما تاخد فى مادة تقدير F ده أولاً هيأثر فى الـ GPA بتاع الترم هتنقصك شوية حلوين وهتأثر فى التراكمى برضه بيبقى فى GPA تراكمى لكل ما سبق من سعة ما دخلت الكلية وده اللى فى الاخر خالص هتتخرج بيه 

والمادة اللى اخدت فيها F وهتاخدها بعد كدا تانى فى تانى مرة بتتحرم من التقديرات اللى بحرف الـ A اقصى تقدير تجيبه هو B+ فى الاعادة حتى لو جبت اعلى هتاخد B+ 

وفى الاعادة بتتحاسب على المادة مش بتبقى ببلاش بيبقى فى مصاريف للساعة وحسب المادة كام ساعة 

لكن المادة اللى مقفولة بسبب مادة بتبقى متأجلة لما بتاخدها بتاخدها جديدة عادى اول مرة تاخدها ولاحظ ان كل مادة ليها عدد ساعات فلازم يتعمل حسابها فى المكان فى عدد ساعات الترم مش زى نظام الفصلين مادة بتتشال بتتاخد جنب باقى المواد لا مفيش كدا هنا الترم متحدد كل حاجة وليها قيمتها ومكان بتاخده 

لو واحد شال مادة واحدة يشوف المادة دى بتقفل مواد ايه وراها والمادة مش شرط ياخدها بعد سنة لا مش شرط ممكن تفتح فى ترم غير ترمها وياخدها عادى ويشوف هيضبط الوضع ازاى بالنسبة للمواد المترتبة عليها وكدا فى عدد الساعات 

التزمات فى النظام ده 3 ترمات مش 2 

فى ترم الخريف Fall وترم الربيع Spring وترم الصيف Summer

اول ترمين دول الترمين اللى هم ترم اول وتانى فى السنة فى نظام الفصلين

دول فى العام اللى مشمولين فى التعليم المجانى 

لكن ترم الصيف ده ترم اختيارى ومش مجانى 

ترم الصيف ممكن اللى شايل مادة او مادة اتركنت بسبب مادة اتشالت ياخدها فيه وبمصاريف 

لكن مش شرط تبقى كل المواد متاحة ترم صيفى كل كلية ونظامها فى هندسة اسكندرية بتعمل مصاريف الترم الصيفى قليلة بس مش كل المواد بتفتح بيفتح عدد قليل بعكس هندسة عين شمس بتحط مصاريف غالية واغلب المواد بتتفتح

فى نظام اسمه التحسين وده مش ضمن التعليم المجانى 

بيسمحلك تاخد مواد نجحت فيها فعلا تانى ولو جبت تقدير اعلى يتحسبلك واغلب الناس بتلجأ للطريقة دى فى التنسيق لو وداهم قسم مش عايزينه وعايزين قسم تانى فبيحسنو مواد ويحولو قسم تانى بس طبعاً هيمرو بعقبات ان فى مواد فاتتهم فى الترم ( ولاحظو هنا مسمهمش شايلينها اسمهم مخدوهاش تفرق جداً زى ما قلت من شوية عن معنى شايل مادة واخد فيها F ) فغالباً بتقلب بتاخير ترم فى الاخر زيادة

فى الاخر لازم هتتخرج بـ GPA تراكمى 2 

لو مجبتهوش فى الاخر هتفضل فى الكلية تحسن مواد لحد ما تجيبه غير كدا مش هتتخرج 

يعنى النظام ده بيضمن من الاخر خريج حاصل على 70 % على الاقل مبيعترفش بخريج جايب اقل من كدا 

ده ملخص كدا للنظام واللى عايز يقراه بالتفصيل

ملحوظه

لو داخل كلية منهم او هتحول من كلية تانى ليهم أنصحك اقرا كل التفاصيل عن النظام قبل ما تفكر تدخلها لو مقرتهاش هتندم الصراحة 😂😂 خصوصاً لو من الفئة اللى هتجيب أقل من 70 % تخيل تبقى جايب اقل من كدا ومش فاهم ولا حاجة فى النظام هتعمل ايه ولا هتتصرف ازاى لازم تبقى فاهم مينفعش تبقى داخل الكلية على عمى